Herzlich willkumme beim Woigut Wendel
in Bockerem in de Palz, an de Deitsch Woistrooß
In Bockerem gebt's de Woioobau seit iwwer 1200 Johr. 's Kultiviere vun de Rewe un's Woimache kennt mer schun seit de alde Reemer. Mer, die Winzerfamilie Wendel, wohnen schun seit viele Generatione in unserm herrliche Pälzer Edel-Woidorf.
Uff unserm Woigut sin mer's ganze Johr iwwer mit de Pfleg un em Ausbau vun unsere Rewe beschäfdischt. E Ärwet, die oft vum friehe Moje bis speet am Owend dauert.
's Endergebnis vun dere Ärwet sin ausgereifte un hervorragende Rot- un Weißwoi, Winzersekt, Ligeer un Schnäps aus Obscht vun unserm Woigut. Wann Se die mol versuche wolle, dann schicke mer Ihne gern e Prowierpaket zu.
Bei uns kennen 'Se aach Urlaub mache!
Zum Iwwernachte hän mer ruschtikale Zwääbettzimmer aber aach moderne Apartments un do is fer Ehrn Gschmack bestimmt ebbes debei.
Sie grien vun uns e abwechslungsreiches un ausgiebisches Friehstick un am Owend servieren mer Ihne gern e Schlummertrunk.
Unser "Bockremer Kulturlandschaft" steckt voller Gschichte un des schääne Leinigerland is wie fer zum Wannere, Rad fahre un fer Erkundunge gemacht.
Un weil des Bockerem aa verkehrsmässisch gut leit, zwische de A 6 un de A 61, kann mer ganz schnell un ääfach in so bekannte Schtädt wie Worms, Derkem, Speyer, Määnz odder Heidelberch kumme.
Mer laden Se recht herzlich dezu ai, unser Woigut, am Dor vun de Deitsch Woistrooß, se besuche. Gennen Se sich mol des herrliche Mittelmeerklima un die Pälzer Spezialitäte un frääen Se sich iwwer unser Pälzer Gemietlichkeit.
Zu ääm besonnere Erlebnis kennt Ehrn Urlaub uff unserm Woigut schunn werre!
Sie kennen uns gonz ääfach oorufe 0 63 59/41 30, odder uns e E-Mail schicke.
Mer dehten uns frääe, Eier Familie Wendel
Leininger Ring 6
D-67269 Bockenheim
Telefax: +49 (0) 63 59/46 40
Internet: www.winzerhof-wendel.de